खोटाङ, १३ माघ । खोटाङको दिक्तेल रुपाकोट मझुवागढी नगरपालिकाका मेयर तीर्थराज भट्टराईले जापानको तोचिगी नगरका प्रमुख ओखावा हिदेकोलाई नेपाली मौलिक संस्कृति, पहिचान र राष्ट्रियता झल्काउने सामग्री उपहार स्वरुप हस्तान्तरण गरेका छन् ।

मैत्रीपूर्ण भ्रमणका क्रममा जापान पुगेका मेयर भट्टराईले मेयर ओखावा हिदेकोलाई किरात समुदायको संस्कार संस्कृतिसँग सम्वन्धित वाबु (चिन्डो), चोयाबाट बनेको भुने, थुन्सेदेखि नेपालको हिमाल, बुद्धको मुर्ती, दुई देशको झण्डा अंकित लगायतका उपहार हस्तान्तरण गरेका हुन् । मेयर भट्टराई र ओखावा हिदेकोबीच बिहिबार भेटघाट भएको हो ।

खोटाङका शैक्षिक अभियान्ता सुर्य राईले सामाजिक सञ्जालमा ‘मेयर भट्टराईले आफ्नो नगर र आफ्नो देशको मौलिक, साँस्कृतिक पहिचानजन्य सामग्री जापान पुर्‍याउनु गौरवको विषय भएको’ प्रतिक्रिया दिएका छन् । तोचिगी नगरका प्रमुख ओखावा हिदेकोले स्थानीय प्रचलन अनुसार उच्च सम्मानका साथ प्रदान गरिने अंगुरबाट बनेको प्लेट र स्थानीय हस्तलिपिबाट बनेको पंखा उपहार स्वरुप मेयर भट्टराईलाई हस्तान्तरण गरेकी छन् ।

मेयर भट्टराईले तोचिगी नगरका मेयर सामु ‘नेपाल र जापानको घनिष्ठ र मित्रवत सम्वन्ध अमर बनाउन तोचिगी आएको’ बताएका थिए । भेटघाटका क्रममा मेयर भट्टराईले मेयर ओखावा हिदेकोलाई दिक्तेल रुपाकोट मझुवागढी नगरपालिका भ्रमणका लागि निमन्त्रणा दिएका छन् ।

‘जापानको सडक, शिक्षा, कृषि, फोहोर व्यवस्थापन र सरसफाई, अतिथि सत्कारको संस्कृति, कामप्रतिको लगाव र कर्तव्यबोध गर्ने जापानी नागरिकको विषयमा जति बढेको र सुनेको थिएँ,’ मेयर भट्टराईले भने, ‘यहाँ आएर प्रत्यक्ष हेरेपछि मैले पढेको र सुनेको भन्दा अझ धेरै गुणा पाएँ ।’ गत मंसिर ९ गतेको मन्त्रीस्तरिय निर्णय अनुसार भट्टराई पुस २९ गते भ्रमणका लागि जापान गएका हुन् ।

भेटघाटका क्रममा तोचिगी नगरका प्रमुख ओखावा हिदेको, नगरपालिका अन्तर्राष्ट्रिय समन्वय विभाग प्रमुख आओकी हिरोसी, निर्देशक आकीहिरो ओवातमका, नीति निर्माण विभाग प्रमुख केवुकावा वातारु, शाखा प्रमुख ओसिताका ओसियामा तथा शिक्षा शाखाका उपप्रमुख केइची यामागुचीको सहभागीता रहेको थियो ।

मेयर भट्टराईको स्वागतमा तोचिगी नगरको गेटदेखिभित्र नेपाल र जापानको राष्ट्रिय झण्डा लहरै राखिएको थियो । भट्टराई गेटबाट प्रवेश गरे लगत्तै दायाँ–बायाँ बसेका कर्मचारीले नेपाल र जापानको राष्ट्रिय झण्डा हल्लाउँदै स्वागत गरेका थिए । तोचिगी नगरले मेयर भट्टराईलाई दिइएको सम्मानले गौरवान्वित बनाएको एनआरएनए तोचिगी अध्यक्ष मन्दीप क्षेत्रीले बताएका छन् ।

तोचिगीमा १५ वर्षदेखि बसेर एसएमएस कर्पोरेसन कम्पनी सञ्चालन गर्दैआएका महेश लुईटेलले मेयर भट्टराईलाई दिइएको सम्मान यसअघि तोचिगीको सरकारी स्तरमा कहिल्यै नभएको प्रतिक्रिया दिएका छन् । दुई नगरका प्रमुखबीचको भेटले दीर्घकालिन सम्वन्ध स्थापित गर्न कोसेढुंगा सावित हुने र भगिनी सम्वन्ध स्थापित हुने संकेतका मिलेको शेर्पा ट्रेडलिंक कम्पनी जापानका अध्यक्ष निमा शेर्पाले बताए ।

जापानको तोचिगी नगरका प्रमुख ओखावा हिदेकोलाई नेपाली मौलिक संस्कृति, पहिचान र राष्ट्रियता झल्काउने सामग्री उपहार स्वरुप हस्तान्तरण गर्नुहुदै दिक्तेल रुपाकोट मझुवागढी नगरपालिकाका मेयर तिर्थराज भट्टराई ।