बिहिवार, कार्तिक १३ २०८३Oct 29 2026
- ताजा अपडेट :
बिहिवार, कार्तिक १३ २०८३Oct 29 2026
आइतवार, चैत्र ३१ २०८१
नेपाल वाइड
खोटाङ, ३१ चैत्र । खोटाङको दिप्रुङ चुईचुम्मा प्राज्ञिक समाजले आयोजना गरेको राष्ट्रिय खुल्ला कविता प्रतियोगितामा उदयपुरकी कवि सुमी पोखरेलले प्रथम स्थान हासिल गरेकी छन् ।
दिप्रुङ चुईचुम्मा गाँउपालिकाको प्रायोजनमा भएको प्रतियोगितामा देशभरबाट प्राप्त ६७ वटा कविता मध्येबाट पोखरेलको कविता सर्वोत्कृष्ट ठहरिएको हो ।
शनिबार दिप्रुङ चुईचुम्मा गाउँपालिकाको सभाहलमा आयोजित कार्यक्रममा समग्र कविताहरू मध्ये छानिएका १५ वटा कविता वाचन गरिएको थियो । भौगोलिक विकटताका कारण केही कविहरू वाचनका समयमा उपस्थित हुन नसकेको आयोजकले जनाएको छ ।
प्रतियोगितामा धनकुटाका भरत थापाले दोस्रो स्थान हासिल गरेका छन् भने खोटाङ जिल्ला केपिलासगढीका अनाम उपेक्षित तेस्रो स्थानमा रहेका छन् । यसैगरी सिन्धुलीका रुपक जमरा र धनकुटाका अनिल सुवेदीले सान्त्वना स्थान प्राप्त गरेका छन् ।
प्राज्ञिक समाजकी सचिव आस्था कोपिलाका अनुसार प्रतियोगितामा प्रथम, द्वितीय, तृतीय र सान्त्वना स्थान हासिल गर्ने कविहरूले क्रमशः ३० हजार, २० हजार, १० हजार र ५–५ हजार रुपैयाँको पुरस्कार तथा प्रमाणपत्र प्राप्त गरेका छन् ।
पुरस्कृत कविहरूलाई नेपाल प्रज्ञा प्रतिष्ठानका कुलपति भुपाल राईले पुरस्कार तथा प्रमाणपत्र हस्तान्तरण गरेका थिए । देशव्यापी रूपमा आयोजित यस खुल्ला प्रतियोगितामा कास्की, रुपन्देही, मकवानपुर, सिन्धुली, धनकुटा, ओखलढुँगा, काठमाडौँ र उदयपुरलगायत ११ वटा जिल्लाका कविहरूले अन्तिम प्रतिस्पर्धामा सहभागिता जनाएका थिए ।
